香港社會好多嘢要小心，不過唔係政治前途，而係政府無能。好似豬流感來勢兇猛，專殺小朋友及青年人，目前公院淪陷，政府只是一味齋噏流感高峰期未過，不排除有更多人死亡，「恐嚇」完，市民又唔見政府有何政策跟進，連有冇增加醫護人員都冇講，市民只知好多「非緊急手術」被延期，睇街症更是天長地久的事，等到你心慌。
政府吹水就天下無敵，一條連貫港島東西區嘅海濱單車徑，講咗幾年仍然得個吉，唔怪得煲呔曾拍賀年祝詞要用桔引隻兔仔出嚟，果然意味深長。又如政府○四年提出於大嶼山南部興建越野單車徑，原定○八年完工，結果拖到舊年至訂出具體方案，等到動工之日，老朽睇怕已移居木星矣！
講到扶貧紓困，又係齋噏多於實際。「關愛基金」只為政治化妝，樓價飆升，物價狂加，政府庫房水浸，依然甘願被罵守財奴，「應使則使」，就係唔使在民生上。「鼓勵就業交通津貼計劃」唔湯唔水，同居男女要視作一個家庭計，不能分開申請，如此剛愎自用，不合情理，真係好易車毀人亡。好簡單，政府鼓勵市民就業，卻要設下多多關卡。其實，市民肯加班，無非想改善生活，好心就唔好計較幾多入息和幾多資產，搞到基層市民就住加班，才可攞區區六百元津貼。有心幫人就咪搞咁多無謂動作，完全違反平衡得失的藝術。
玩政治而不講原則，求享樂而沒有良知，搞環保而不講實效，講關愛而刻薄寡恩，敬神靈而不作奉獻，試問這樣的政府如何會誠心的關愛百姓？