政情：政黨揀戰將各出奇謀
政治人物同傳媒，長久以來都係亦敵亦友嘅關係，傳媒負責監察政治人物，政治人物就要絞盡腦汁希望多啲見報，不過見報都未必係好事，有啲負面報道出咗街，真係好耐都補唔番。各政黨已為出戰明年立法會選舉，訂下黨內初選機制，其中喺直選大戶民建聯內部，有意出選嘅黨員連見報率都要鬥一番。
民記內有志參選者未同其他政黨廝殺，內部已先要展開大火併，而其他政黨都喺呢方面絞盡腦汁。自由黨主席劉健儀話，揀人出戰立法會，主要以選舉民調做依歸，數字最公正，毋須多拗。工聯會揀人如康文署驗樹，都係用對眼嚟觀察嘅，黨團召集人黃國健話，佢哋未必會計見報率，反而重視參選者對工聯嘅忠誠度喎。
民建聯嘅立法會直選出戰權甄選機制，正由副主席溫嘉旋牽頭率領小組專責研究，希望訂出一套系統性評分準則，民記一向行權威管治，邊個排頭位參選、邊個負責做轎夫替人作嫁衣，向來由高層協商拍板，所以，依家首次大搞公開遴選，點樣評分、有何細則，引起黨內關注。
負面花邊新聞都計數？
據了解，甄選機制仍在醞釀中，但輪廓漸成，按構思，評分準則分得好細，各佔若干比重，五個直選地區中得總分最高者，依序取得出戰入場券。但其中一項評分，叫「與傳媒關係」，講白啲，即係鬥見報率，就令唔少人擔憂，驚本身係現任立法會議員或區議員，以及早已人氣高企嘅第二梯隊尖子，擁有絕對優勢，呢個分數雖則可能只佔總分嘅一成左右，但若因呢幾個百分點而定生死，咁就好唔抵。
仲有，「與傳媒關係」概念模糊，量化咗，即係鬥見報率，如何分高下，當中亦有好多易激起爭議嘅灰色地帶，好似被報道點名話某某蛇王唔開會，或者被記者影到拍拖shopping咁，呢類唔多正面嘅新聞計唔計數先？民記新人以後要上位，根正苗紅、紅褲子出身，呢類準則可能已經跟唔上時勢，男嘅練定一對四十吋胸肌做「肌肉男」，女嘅改着吊帶背心超短裙，約神秘男友喺置地coffee shop歎下午茶，仲要學識喺適當時候烏低身執嘢，話唔定更易喺呢場立法會選舉熱身賽中殺出重圍。