中環耳目：項明生食烤麩回味童年
遊蹤遍布全球幾十個國家嘅Sony Computer Entertainment香港公司市場部總經理項明生（James），唔止識得去旅行歎世界，仲好識享受美食。上周五中午卓妮見到佢喺尖沙咀小南國壹號，歎佢至愛嘅椒鹽小黃魚同埋四喜烤麩，James仲教卓妮點樣炮製烤麩添！
原來James爸爸係上海人，爸爸自製嘅烤麩同熏魚，成為佢童年最美味嘅回憶。佢話，將豆腐擺喺雪櫃冰格一日，然後落啲豉油、糖等調味料，就係最經典嘅上海冷盤烤麩喇。記得落多啲糖喎，咁先夠上海菜味。
四喜烤麩係小南國嘅招牌冷盤，四喜係指毛豆、金針、雲耳同埋茶樹菇，加上質地鬆軟嘅烤麩，食落夠晒入味。椒鹽小黃魚更加係小南國嘅招牌菜。佢哋係以秘製醬汁醃製，然後蘸上椒鹽脆醬炸香，入口香脆惹味，令人回味無窮。
錯解小黃魚做「小」黃魚
James笑言，佢一直以為小黃魚係體形細小嘅黃魚，諗住黃魚瀕臨絕種咪食多啲小黃魚囉！點知喺一次飯敍畀大師糾正，先知原來兩種魚係唔同架！