中環出更：田少超豪遊艇地中海首航
自由黨榮譽主席田北俊訂購咗一艘新遊艇，仲打算親自去歐洲接收添。田少○九年以「海嘯價」九千萬元，訂購咗一艘勞斯萊斯級豪華遊艇，本來喺今個月可以收貨，但田少特別要求英國船廠等到年中先至運去法國交收，原因係田少幾乎年年夏天都同家人去地中海遊船河，所以安排新遊艇喺法國即提貨即用，坐新落水嘅海上豪宅周遊地中海，真係諗起都興奮。
為外孫赴北海道滑雪
田少本有遊艇「Manhattan Express」，但為咗畀三個乖孫遊船河時更加多私人空間，於是拍板訂製咗一艘007占士邦御用嘅Sunseeker Predator 115超級豪華遊艇，呢艘dream boat 終於可以喺今年中行下水禮。今年農曆新年期間，田少同女兒一家去咗北海道滑雪，佢仲樂意做外孫晉仔嘅教練兼阿四添，田少仲話，因為晉仔，佢近年滑雪都捨歐美而取日本，因為歐美嘅雪山太高，跌親乖孫點算？