中環出更：張震遠速遞蛋糕討妻歡心
張震遠（Barry）係近年嘅公職王，佢身兼市區重建局主席、香港商品交易所主席同埋薪酬趨勢調查委員會替代主席等。不過佢有一個天職就係做個好老公，好似上星期六太太吩咐佢去攞蛋糕，佢義不容辭，就算不知幾狼狽都要達成任務。張太今日情人節見到我哋呢輯相，唔知會唔會特別甜到入晒心呢？
卓妮上星期六見到Barry着住黑色褸同牛仔褲，喺太子大廈COVA買蛋糕，佢雙眼喺蛋糕專櫃前來回掃射，最後畀一個栗子蛋糕吸引，馬上叫店員包起佢。
講手機摷車匙狀甚狼狽
COVA蛋糕喺名人圈個「朵」非常響，賭王何鴻燊喺病榻休養期間，都心思思想食杧果忌廉蛋糕，莫非Barry都係甜品迷？非也！原來佢甚少食蛋糕，係太太鍾意食至真。點解要佢親自去攞，Barry輕描淡寫話：「咁啱經過，順便啫。」
Barry買完蛋糕後由太子大廈跑去攞車。但手機喺半路中途響起，行到座駕，佢唔想嘥時間，於是佢左手攞住電話，右手將盒蛋糕放喺地上，再摷車匙開門，然後將蛋糕安頓喺後座，都幾狼狽。Barry為討太太歡心，竟然唔介意做「蛋糕速遞員」，認真唔話得。
講番COVA栗子蛋糕，點解咁好味？據講蛋糕由意大利栗子製成，味道零舍香滑，加埋淡忌廉，濃淡適中，將栗子香氣發揮得淋漓盡致。想食嘅話，記得提早預訂，呢款係熱賣之選，同杧果忌廉蛋糕一樣，手快有，手慢無。
卓妮