逆民意而行，與人民作對，連個天都唔會幫。呢，「現代法老王」埃及總統穆巴拉克就係人辦嘞，佢鐵腕統治三十年，視百姓如草芥，搞到民不聊生，天怒人怨，卒之敵唔過人民力量，灰溜溜落台。
山雨欲來風滿樓，社會動亂必有先兆。好似埃及咁，失業嚴重，通脹失控，貧富懸殊，民眾被迫走上街頭，最終演變成推翻總統嘅群眾運動。前車之覆，後車之鑑，本港社會同樣瀰漫仇富仇官情緒，民怨愈積愈多，如果港府繼續闊佬懶理，隨時好似炸彈咁一觸即發，到時香港變成另一個埃及都唔出奇㗎。
唔係功夫茶危言聳聽，今時今日，通脹肆虐，衣食住行樣樣加價，基層市民生活負擔愈嚟愈重，偏偏遇着個涼薄兼麻木嘅政府，對民間疾苦視而不見，唔向窮人伸出援手，反而對有錢人呵護有加，搞到貧富懸殊不斷擴大，再咁落去，想唔官逼民反都幾難喇！
最離譜嘅係，港府坐擁二萬幾億元外匯及財政儲備，而貧窮人口卻超過一百二十萬，反映貧富差距嘅堅尼系數竟然冠絕全球發達經濟體，簡直係香港之恥。社會不公、分配不均、貧者愈貧、富者愈富，你話香港人有乜辦法唔滿肚怨氣，又有乜辦法唔仇富仇官吖。
其實，仇富皆因官起。正如學者話齋，目前社會出現仇富情緒，同當局太照顧有錢人利益有關，如果當局繼續「明益」大財團，令市民覺得有錢佬乜都賺到盡，只要有一個觸發點，發生暴力事件絕對唔出奇。
話時話，當年六七暴動，觸發點就係天星小輪加價咁小事嘅咋。再講近啲，呢次埃及總統穆巴拉克倒台，都係因為鄰國突尼斯一個失業大學生做小販畀警察打壓，投訴無門憤而自焚，觸發「茉莉花革命」，再蔓延到埃及。如果港府繼續漠視市民嘅訴求，今日係「茉莉花革命」，聽日係「香江革命」，一啲都唔奇。
有臨床心理學家提醒，市民生活得唔到改善，好容易將怨憤發洩喺政府同有錢人身上。溫和嘅上街示威抗議，激進嘅可能做出反社會行為，譬如高空擲物、縱火等。
講開又講，舊年中文大學調查已發現，愈來愈多受訪者認同以激烈手法要求政府回應訴求，顯示社會和諧已經着晒紅燈。點知港府依然故我，對貧富懸殊照樣漠不關心，高官近日甚至拋出「車毀人亡」論靠嚇，令仇富仇官情緒火上加油，簡直豈有此理！
阿拉伯人有句諺語「洪水始於涓滴」，即係中國人講嘅「星星之火，可以燎原」咁話。計功夫茶話齋，社會矛盾惡化，根源在於港府施政無能，分配不均，基層市民分享唔到經濟成果，如果當局執迷不悟，繼續闊佬懶理，民怨遲早大爆發，到時咯喎，唔知邊個「車毀人亡」呢！