政情：林鄭冧功狂擦民記鞋
民建聯灣仔支部尋日舉行新春酒會，除咗有主席譚耀宗同副主席張國鈞撐場外，發展局局長林鄭月娥同政制及內地事務局副局長黃靜文都應邀做主禮嘉賓。話晒仲係新正頭，做得嘉賓當然要美言幾句啦，林鄭致辭時落晒鞋油狂擦民記鞋，估唔到林鄭除咗「好打得」，原來冧人都有一手。
林鄭係虔誠教徒，佢話自己雖然唔係住灣仔，但每周日都會落灣仔嘅教堂做禮拜。佢話每次行到去電車站附近，都會見到民記嘅區議員同義工喺度派傳單，仲話自己每次都會伸手接，點知對方一見到係局長，即時收番張傳單，話係因為局長相當了解民記工作，唔想浪費張紙喎。
林鄭仲一口氣講咗好多個發展局喺灣仔區進行嘅工作，講到自己同灣仔關係幾咁密切。佢仲提到年底就係區議會選舉，呼籲「真誠為香港」嘅人都一齊參與。乜嘢係「真誠為香港」？咪就係民建聯嘅口號囉！咁肉麻骨痹，問你服未？！