中環出更：范鴻齡行運無去埃及

依家自由自在嘅范鴻齡尋日入馬場支持身為馬會大董嘅老友葉錫安，到場無耐兩人就孖住一齊拉頭馬，佢笑呵呵話要沾吓葉大董嘅旺氣，卓妮就覺得佢哋互旺就真，事關范鴻齡立春未到已經行緊運，否則卓妮可能要過咗元宵先可以同佢拜年。

點解咁講？因為佢同太太原本諗住二月一日出發去埃及旅遊，好彩遇咗港府啱啱發出黑色旅警，否則分分鐘要喺杜拜送虎迎兔。

洪祖杭親自拉頭馬

至於啱啱喺廈門度歲返嚟嘅福建幫全國政協常委洪祖杭，愛駒「火龍駒」幫佢喺香港三級賽中，贏咗一百卅幾萬頭馬獎金。上次洪生有事唔得閒，由乖女代拉頭馬，今次可以同太太親自拉頭馬，當然開心啦，洪太仲話點慶祝會交由老公決定添。

「造紙大王」李運強家族同全國政協委員張華峰一家咁啱都係去新加坡玩，唔知係咪星洲啲水淡味啲，佢哋雖然都睇好經濟，但李生話今年主力收取之前投資嘅資產回報，張生亦話會喺股市套現部分資金，耐心等候更多人民幣投資產品出爐。

啱啱喺星洲返嚟嘅李運強（右）同太太（中）、新抱一齊入馬場，個個都容光煥發。 （何偉鴻攝）

洪祖杭（右）贏百幾萬獎金，大發新年財，太太話由老公決定點慶祝。