港府高官愈來愈不知所謂，明明衰咗要補鑊，佢哋偏偏講成「優化」，簡直係九唔搭八。
呢，勞工及福利局局長張建宗又出嚟做示範喇。話說舊年推出嘅「鼓勵就業交通津貼計劃」，由於劣評如潮，當局被迫作出修改，張建宗稱之為「優化方案」喎。可惜，所謂優化換湯不換藥，係咁意放寬申請入息上限，二人家庭由八千五百調高到一萬蚊，三人家庭由一萬二千調高到一萬三千蚊，至於各界要求採取個人同家庭雙軌審查，以及放寬每月須最少工作七十二小時嘅規定，當局一於少理。
按張建宗嘅如意算盤，計劃放寬之後，受惠人數會比原來多近五萬，增至三十八萬人喎。但事實係唔係咁，真係好有疑問，事關呢項計劃唔湯唔水，同各界尤其係打工仔嘅要求仲有好大距離，究竟幾多人可以受惠，根本冇人知，張建宗吹水唔抹嘴，信佢一成都嫌多。
正如有立法會議員話齋，入息放寬少得可憐，對打工仔幫助有限，實在難以接受。亦有議員批評，就算當局調高入息上限，對家務助理呢類兼職人士毫無幫助。再講，如果兩公婆都攞最低工資，已經超出入息上限，根本冇資格申請，所謂鼓勵就業，完全係大隻講。
講真，交津計劃嘅初衷係希望令更多人投入就業市場，自食其力，弊在港府一味諗縮數，諸多設限，對打工仔查家宅咁查，計劃一推出就劣評如潮，畀打工仔狂鬧「搵笨」。
當局將舊有嘅跨區交津計劃加碼，變成「鼓勵就業交通津貼計劃」，話就話不限區域，但實際上限制嚴苛，要求多多，結果成個計劃走晒樣，同初衷完全脫節，交通津貼變相淪為扶貧補貼，可惜又到喉唔到肺，買糖唔甜買鹽唔鹹，你話係咪搞笑吖。
唉，交津計劃爭議多多，能唔能夠達到鼓勵就業嘅目的都成問題，家陣通脹又殺到埋身，樣樣都貴，公共交通更帶頭加價，但基層工人薪酬增幅遠遠追唔上物價飆升，唔該港府聽下市民心聲，諗下點至可以真正幫到打工仔好過喇。講到尾，交通津貼只能治標，創造就業先至可以治本，只有扶助貧困同增加就業雙管齊下，至可以解決問題。
講開就業，有樣嘢真係幾諷刺。呢，交津計劃究竟可以令幾多打工仔受惠仲係未知之數，但勞工處兵馬未動，糧草先行，居然準備成立一個二百人嘅新部門處理有關申請喎。大家諗吓，二百人嘅部門每年要使幾多公帑呢？隨時妹仔大過主人婆，扶貧不成先扶官呀！
計功夫茶話齋，向低薪打工仔發放交通津貼，鼓勵就業，本來係好事，弊就弊在當局閉門造車，擇惡固執，搞到爭議多多，好事變成壞事。唔怪得好多立法會議員話到明對呢個微調方案唔收貨，要求押後審議喇！