政情：阿Paul「踩場」炮轟胡兆英
日前爆出嘅「翻版阿珍」涉嫌同內地旅客互毆事件，除咗令香港再一次蒙羞，原來亦牽扯到當今旅遊界兩位代表人物嘅選舉角力，佢哋就係旅遊業議會主席胡兆英同立法會旅遊界議員謝偉俊（Paul）。
一直盛傳屬於「經濟動力」嘅胡兆英有意角逐下屆立法會旅遊界議席，唔知係咪因為咁，佢嘅曝光率都比以往嘅旅議會主席明顯高好多，唔似前任主席何栢霆咁，將回應傳媒工作下放畀旅議會總幹事董耀中做。梗係喇，董耀中來自經濟動力嘅死敵自由黨，上屆立會選舉僅以些微票數輸畀阿Paul，正所謂「肥水不流別人田」，胡兆英自然唔想董耀中曝咁多光喇！
以今次事件為例，胡兆英就第一時間彈出嚟，話要調查涉事旅行社有冇違反啱啱實施嘅一團一導遊制度，畀人嘅感覺係先批評咗旅行社先算。不過阿Paul好唔同意胡兆英嘅做法，尋日仲趁胡兆英出席電台節目，專登打上去「踩場」，炮轟一團一導遊影響業界生計，暗批對方唔了解業界生態同處境。有旅遊界人士分析，胡兆英喺今次事件曝咁多光、講咁多嘢，肯定會喺中小型旅行社裏面失晒分，反而死撐業界嘅阿Paul就有分加，連任選情繼續向好。