政情：鐵頭仁生瘡「青春」有價
立法會尋日演習走火警，「走難」議員人頭湧湧，當中民主黨主席何俊仁鼻樑左邊貼咗塊大膠布，仲要貼到歪歪斜斜，相當搶眼。
我哋問鐵頭仁個鼻發生乜嘢事，原來佢純粹係生青春痘，即係生暗瘡，佢仲自嘲話，可能農曆新年寫揮春寫得「青春常駐」多，所以突然咁「青春」。鐵頭仁講得輕鬆，但「青春」有價，幾十歲人先至生青春痘，唔識處理都幾手尾長。佢引述醫生指，粒瘡畀「污糟嘢」入侵，變皮膚發炎，要食消炎藥，但兩日過去，粒瘡依然咁「青春」，毫無凋謝之意，需要打針同轉食另一種藥。佢黨友甘乃威就笑言，鼻頭生瘡有名堂，叫「花開富貴」，真係唔知攞景定贈興。
根據面相之說，鼻頭生瘡有兩種解釋，一係破財，一係旺桃花，不過，無論開邊瓣，都係咁惹是非，鐵頭仁喺新一年都係謹言慎行好啲嘞！