政情：高官唔識潮語變囧樣
立法會尋日舉行一年一度春茗，食飯之前按傳統先嚟一場議員高官大戰，秘書處見今年興講潮語，就決定嚟個「潮語正解大比併」。平時見開市民嘅議員，當然比閉門造車嘅高官潮少少，一眾高官望住潮語啞口無言，結果佔主場之利嘅議員隊大勝高官七比四，喺兔年先威一次。
林鄭搞錯毒男做宅男
高官隊成員有發展局局長林鄭月娥、審計署署長鄧國斌同工業貿易署署長關錫寧，三人平時做嘢就好打得，但講到玩遊戲就完全唔得，一開始就畀解作無奈表情嘅「囧」字考起，齊齊對住螢幕木無表情，立即畀人取笑佢哋正式一副「囧」樣！到咗搶答環節，林鄭企圖從後力追，點知又「毒男」（缺乏異性緣嘅單身男人）與「宅男」（隱蔽男）不分，結果搞到要倒扣分。睇住成班手下畀議員隊狂砌，同場嘅煲呔曾冇幫手提水不特止，仲邊剝花生邊睇戲，完全秉承夕陽政府嘅工作態度。
今年菜式同往年差唔多，不過多咗由韓國同緬甸領事分別送上嘅米酒同威士忌，唔少議員都飲得開懷。不過出名鍾意飲酒嘅政務司司長唐英年，對住兩款酒都耍手擰頭，可能佢費事又再酒後失言喇！