政情：郭炳江陳裕光唔掂最低工資

政府尋日公布新一個最低工資委員會任命，取代已完成歷史任務嘅臨資會，任期兩年，三月一日起生效。委員會主席由資深大律師翟紹唐出任，接替臨資會嘅鄭若驊。九名非官方成員當中，三名勞工界代表、來自本港三大工會嘅工聯會鄺志堅、職工盟劉千石同勞聯李啟明全部順利過渡，三名學術界代表就全數換上新人，至於三名商界代表，就只得香港零售管理協會主席麥瑞琼留低，另外兩人為聚福樓執行董事黃傑龍同銀聯信託董事總經理及行政總裁劉嘉時，接替陳裕光同郭炳江。

陳裕光唔過渡到最低工資委員會，係預料中事，經歷大家樂「扣飯鐘錢」風波一役，佢曾自嘲政治智慧不足，大呻外界喺事件上對佢嘅評價，同佢喺臨資會嘅投入程度唔成正比，覺得有啲委屈。佢自言已經一把年紀，唔適合做粗重工夫，打算跳船嘅意味呼之欲出。

至於新地「二哥」郭炳江，雖然佢喺臨資會表現低調，個人冇因為最低工資問題引起過乜嘢爭議，但當自由黨副主席張宇人爆出「廿蚊論」事件時，就有人質疑「廿蚊張」係受僱於新地嘅旗下公司，令作為臨資會成員嘅佢亦受到牽連，甚至有傳最後「廿蚊張」公開道歉，郭炳江都有喺背後發功。無論有關傳聞係真係假，總之唔再做最低工資委員會，就唔會咁易畀人唱喇！

黃傑龍無懼捲政治漩渦

新貴黃傑龍接受我哋訪問時強調，自己唔係年賺數十億嘅大老闆，旗下集團雖然有廿多間食肆、八百名員工，但同其他中小企一樣日日面對食材通脹同加租壓力，「無人有興趣嚟向我示威」，無懼會捲入政治漩渦。

法例規定工資水平最少每兩年就檢討一次，政治弱勢嘅特區政府更怯於民情，承諾若社會認為有需要，即可加快檢討，加上猛於虎嘅通脹來勢洶洶，勞工界隨時未過半年就會要求調高工資，到時爭拗再起，委員會內嘅三名商界代表定必再成眾矢之的，會否出現「翻版陳裕光」，大家拭目以待。