中環出更：楊釗陳永棋大打穩陣牌
兔年伊始，但股市掉頭插水，經濟似暗湧處處。到底商機何處尋，成為城中富豪最關注話題。「牛仔褲大王」楊釗打穩陣牌，將穩守製衣生意，再出擊買人仔，博至少百分之三升幅；全國政協常委陳永棋亦都建議以守為攻，繼續持有年前以五十八元入貨嘅滙豐，今年再買金保值。
雲集城中富豪嘅中華總商會，尋日舉行新春酒會，逾六百位政商界名人齊到賀，中總會長蔡冠深滿場飛向賓客恭喜發財，多位副會長包括楊釗、林樹哲、方文雄及莊學山等人齊撐場，大談經濟及投資前景。
楊釗投資地產戰績彪炳，今年卻寧願穩守製衣生意老本行，未敢大舉出擊。佢分析話，歐洲金融債務問題未真正解決，加上內地及香港通脹壓力增加，今年市況將現波浪起伏，但佢不忘派定心丸：「有波浪先有機會。」一句講晒，每次震盪，都係低吸時機。如果怕食驚風散者，楊釗教路，買落後大市嘅人民幣，風險低，包無錯。
曾智明患感冒人消瘦
棋哥就選擇步步為營，坦言美國早前狂印銀紙谷經濟，谷起第二個經濟泡沫，泡沫儼如炸彈，一旦爆破，殺傷力難料，呼籲小投資者炒股莫借孖展，量力而為，而樓市就莫高追，預計今年樓市難大升。
卓妮轉頭撞見中總青年委員會主席兼金利來太子爺曾智明（Ricky），見佢瘦咗成個圈，原來新年前患上感冒未愈，褲頭都鬆咗，但Ricky堅持瞓身工作，嚟緊將拍住初任青委會副主任嘅林智彬（Lawrence），齊搞好中總青委會。
唔少名人趁新年抖抖充電，方文雄大年初二同太太去大埔林村許願樹擲寶牒，朝早九點抵達，冇人同佢爭。蔡冠深太太蔡關穎琴就趁新年遊泰國，驗身兼度假。
卓妮