政情：屈奇安攞正牌撐救護
最近加入葉劉淑儀檔新民黨做埋中常委嘅屈奇安，做咗消防處救護員會主席多年，一直不滿消防處當救護係「二奶仔」，為爭取權益向部門發炮多年，仲試過為爭取救護員有時間食飯，嘈到去中央。佢去年底退休，並據聞會轉戰區會，好多人以為救護職方自此會偃旗息鼓，消防長官可以鬆一口氣，點知江湖傳聞，屈Sir竟然退而不休，仲做埋救護員會嘅總幹事添！
救護員會以前只聞有正副主席，何來總幹事呢？屈總就親自講解，有救護前輩有先見之明，早幾年建議該會修改會章，准許聘請熟悉救護事務嘅人出任總幹事輔助會務，有權代表救護員會出去開會發言，不過註明年薪只係一蚊，屈總就笑說，自己人工好高！
樂做一蚊雞總幹事
佢仲話，出任救護會總幹事，係出於個心始終對救護嗰份情放唔低，老土啲講係「不離不棄」，所以不惜做「一蚊雞總幹事」，繼續為救護而戰，睇嚟消防處長官今次有排頭痕，唔知其他紀律部隊工會會唔會倣效呢？