政情：IT豪遊日睇猿猴浸浴
唔少人都鍾意去旅行度歲，立法會資訊科技界議員譚偉豪（IT豪）啱啱就喺日本長野避年返港，對當地乍暖還寒嘅天氣同野生猿猴念念不忘。IT豪話，今次一家人去到東京，個個都嫌當地天氣太熱，決定轉戰長野，享受零下十度觀雪嘅滋味，仲令佢有機會一睹長野獨有嘅野生猿猴廬山真面目！
租上網器享親子樂
IT豪一家人去咗長野縣下高井郡山嘅地獄谷野猿公苑，佢話野生猿猴好精靈，見佢哋浸溫泉仲歎過人去浸，但可惜當地政府為咗保護猿猴嘅生活環境，只可遠觀，如果唔係，可以共同浸浴觀雪一定好過癮。
雖然旅行散心，但IT豪仍不忘IT人本色，教大家點樣外遊時避免漫遊炸彈帳單。佢話日本依家有日租無線上網器，只係百幾蚊港紙一日，可以五個人同時上網，咁就唔使用漫遊data咁貴。IT豪仲靠無線上網器得到意外收穫，因為今年讀中四嘅囝囝要黐住佢上網，所以六日旅程都同佢坐埋一齊，兩父子除咗上網之餘仲多咗時間傾偈，大家第日要全家旅行時不妨偷吓師！