政情：Tim霍娶新抱啟剛話晒事
新年總是喜氣洋洋，尋日係民政事務局的春節酒會，前排畀亞運搞到一頭煙嘅立法會體育界議員霍震霆（Tim）紅光滿臉咁出席。
早前跳水公主郭晶晶退役，Tim嘅愛兒霍啟剛同郭晶晶拉埋天窗嘅消息就不脛而走，大家見到Tim霍當然要走去恭喜吓佢，順便問吓佢幾時會有好消息帶畀大家。點知Tim霍竟然會錯意，以為講緊體育政策，九唔搭八完一輪先耍手擰頭迴避問題，仲好婉轉咁話有好事實會通知大家，不過見佢笑到見牙唔見眼個樣，應該離好事都不遠啦！
我哋之後再直接問佢幾時飲新抱茶，Tim霍好誠實咁話仲未收到囝囝通知，仲話依家啲年輕人鍾意獨立思考，唔係樣樣嘢都要交畀父母去決定，所以幾時先可以夢想成真，都要交返畀啟剛決定喎！
乖仔不作評論
咁啱得咁蹺，啟剛同爸爸前後腳咁出現酒會，當然要直接問下男主角到底幾時迎娶國寶啦！點知啟剛怕怕醜醜咁話，唔明點解個個最後都問佢呢條問題，而佢為咗公道起見，只會答標準答案，就係不作評論喎。