按照新年傳統習俗，年初二梗係要搵個有頭有面嘅政府高官去沙田車公廟求籤o架啦。好衰唔衰，○三年撞正時任民政事務局局長何志平腳頭唔好，一嘢求到一支下籤，結果當年成個香港變咗地獄黑仔王，又沙士，又股災，又樓災，搞到人人一殼眼淚。於是乎，高官怕咗「求籤問責制」，一個二個玩縮沙，咁就改由新界鄉議局主席劉皇發齋戒沐浴頂硬上。
可惜吖，捱義氣嘅劉皇發似乎都唔係好手氣，今年雖然未至於求得下籤，不過都唔係幾過癮㗎咋，車公靈籤話喎：「威人威威不是威，只當着力有箴規，白登曾起高皇閣，終被張良守舊圍。」
靈籤到底點解呢？典故源於漢高祖劉邦，呢一個流氓皇帝不聽規勸，硬係一意孤行要同匈奴開戰，結果被圍於白登山，七日七夜方得脫險。至於籤文提到嘅張良，本來係劉邦打江山嘅心腹，不過劉邦性格無賴，只可共患難，不可共富貴，做咗皇帝之後誅殺功臣，張良一見唔對路，辭官歸隱嘞。
其實呢，即使大家唔知道籤文典故，淨係睇到第一句「威人威威不是威」，都可以心領神會啦。問題係，所謂威人到底係邊個？玄學家吳佩孚就話嘞，威人唔係一個人，而係泛指香港嘅管治班子。
呢嗱嗱嗱，你都咪話唔邪，車公位於沙田，而香港嘅管治班子之中曾蔭權做過沙田政務專員，而財爺曾俊華又做過沙田助理政務專員，兩個曾氏宗親同鄉會成員同沙田極有淵源。既然車公點醒世人，威人威威不是威，沙田發迹嘅曾家班唔失威就假咯！
唉，講到失威，淨係最近發生嘅「翻版阿珍」導遊阿蓉惡鬥內地遊客事件已經夠瘀皮啦，內地傳媒更加以「旅遊醜聞」大篇幅報道，簡直係威人失威失到腳趾尾。
事實上香港回歸以來確係冇乜好日子過，以往「魚翅撈飯」嘅風光一去不復返。喂喂喂，你睇你睇，有「中國首善」之稱嘅內地富商陳光標，繼高調去台灣派錢之後，話下一站要嚟香港扶貧。見到陳首善咁慈悲為懷，功夫茶直頭係百感交集，以往只會係香港人接濟國內同胞，今時今日風水輪流轉，竟然係國內同胞接濟港燦難胞，名副其實就係威人威威不是威！
樓價高企，物價高漲，日子難捱，你又真係好難怪幾乎每個階層都有人怒氣沖沖上街抗爭。好似八十後咁吖，你話佢哋行為激進咩？查實係有苦衷o架，佢哋見唔到前途，佢哋見唔到希望，以前班老鬼就話有上位機會啫，八十後乜都冇呀，事關好似曾氏宗親同鄉會成員咁嘅四十後五十後阻住地球轉！
香港一度非常威，家陣變得不是威，歸根究柢係一連串施政失敗所致。計功夫茶話齋，追本溯源係一眾水鬼官僚當年上位上得太快有關。記唔記得回歸之前有移民潮呀？又記唔記得有本地化呀？一個移民潮加上一個本地化，益咗成班冇料到嘅官僚扶搖直上，忽然之間水鬼升城隍，咁咪種下一連串禍根囉。
講起上嚟唔知好嬲定好笑，作威作福嘅官僚一旦不是威，受苦受難嘅蟻民馬上要示威，喺咁嘅情況之下，管治班子睇怕就會變成，要威又要戴鋼盔！