政情：肥仔明誓爆毓民大鑊

民主黨去年支持政改方案，被社民連不斷批評同狙擊，相當難受，民主黨立法會議員李華明尋日同傳媒提起件事時依然好㷫，斬釘截鐵話自己決定唔再參選立法會之後，將無後顧之憂，誓要喺任期完結之前同毓民、大舊死過，爆兩人大鑊。

肥仔明話，現時該黨八位議員無論開會或私底下已經無再同毓民、大舊佢哋打招呼，佢仲諗過喺議員前廳安裝針孔攝錄機錄低兩人嘅衰嘢，等人知道兩人議會上鬧高官，私底下同建制派議員好老友。

肥仔明又翻舊帳，話社民連喺○八年立法會選舉中狙擊公民黨梁家傑參選特首，當時民主黨都有講好話幫公民黨，但政改一役，公民黨就無投桃報李嘞。

多次公開話唔會再參加立法會選舉嘅肥仔明，喺去年八月一次黨內機密會議上已表明去意已決，佢嘅空缺將會由黨鞭司徒華生前力捧嘅黃大仙區議員胡志偉披甲上陣。