政情：田少打流感針肚皮受罪
流感肆虐，全港心慌。自由黨榮譽主席田北俊尋日朝早出席鄉議局「人日」新春團拜前，走去打流感針，但疑似副作用即刻嚟料，肚皮受罪，輕瀉不適，焗住缺席下午自由黨新春茶敍。
自由黨高層下午三點喺九龍灣總部同傳媒拜年，主席劉健儀（Miriam）、副主席方剛、周梁淑怡（莎姐）同該黨飲食界立法會議員張宇人，早早到齊，但田少卻等極都未見人，冇佢點可以成局？經莎姐拆解謎團，原來田少打完流感針唔舒服「告假」。
世衞調查指，小部分人打完流感針會有副作用，有啲甚至發燒一、兩日，我哋打電話問候田少，佢話，發燒就無，但打完針後隨即肚痛同輕瀉，佢都搞唔清係咪流感針副作用，總之就要休息，希望抖一、兩日可以「再重出江湖」啦。
自由黨退黨黨員、西貢區議員方國珊尋朝喺團拜活動上巧遇田少，二人相見亦是朋友。方國珊話，日後佢嘅平台會喺專業動力，仲會同經濟動力多多合作添。