政情：發叔新正頭做大龍鳳
鄉議局尋日舉行新春團拜，主席劉皇發喺致詞時大爆猛料，話已經解決菜園村嘅路權問題，仲即場拉埋副主席張學明簽咗封信畀一名菜園村村民代表，話以後村民都可以繼續用條路。發叔有意趁住新正頭團拜拎個頭彩，現場仲有幾位村民突然攔路遞信，要求發叔留任鄉議局主席添，咁大場大龍鳳，想話發叔唔係趁團拜機會補鑊兼造勢都唔得。
發叔話，舊年希望為官員打打氣，講咗一句「官不聊生」，點知引來各方批評，而佢自己舊年又麻煩多多，因為漏報物業買賣利益嘅關係，成為各方抨擊對象，佢話自己已經吸取到教訓，亦令佢對現今香港政治生態文化有更深嘅體會同認識喎。發叔咁講，當然要問問佢有咩體會啦，佢唔想講太多，只係留低八個字：「知所循道、明哲保身」，至於點「保身」，佢冇講清楚。
去年雖然講嘢過咗龍，發叔本身係行政會議成員，今年當然要繼續為政府講好說話，佢話「政通人和」係政府同市民嘅共同責任，因為社會唔和諧，根本就做唔到「政通」喎。不過講法就已經比去年溫和咗好多嘞。
公布菜園村問題解決咗，發叔已經造就到自己好威水。不過現場仲上演咗一場大龍鳳，當發叔準備行出場外接受訪問時，幾位村民突然衝上前，向佢遞咗封要求佢連任鄉議局主席嘅信，希望佢繼續為新界居民打拚。我哋問過沙田鄉委會主席莫錦貴，佢當然就話呢次遞信係由下而上，唔關領導層事喇。
借姜太公談連任
問到佢係唔係會競逐連任鄉議局主席一職，發叔又開始大耍太極，話六月先選，依家仲考慮緊，佢仲講咗句：「姜太公都八十歲先做官啦！」言下之意，似乎係暗示自己仲有心有力，永不言退喎！
我哋即時問問現場反應，張學明力撐發叔，話對方係眾望所歸、民心所向；上水鄉委會主席侯志強亦話會支持發叔，加埋沙田莫錦貴，喺鄉議局嘅地頭，成個團拜即時變咗發叔連任鄉議局主席嘅補鑊加造勢大會。不過鑊補唔補得成，勢造唔造得到，都要睇天時地利人和嘅，今年村代表選舉之後又有鄉事委員會選舉，之後鄉議局埋班，要從心所欲全面操控大局，話咁易咩？