中環出更：阿Paul長衫Look配對節日
向來衣着出位嘅立法會旅遊界議員謝偉俊（Paul），繼日前同紅顏知己白韻琹雙雙戴上皮草帽搶鏡後，近日又有新春出位力作。尋日卓妮喺中環老遠見到一個身穿紅色長衫嘅男子喺度游走，成個古人咁款，睇真啲先知係阿Paul嘅新形象！
阿Paul話，自己身上呢件唐裝係喺中藝買，佢仲一口氣買咗紅、綠、藍同黑四隻色，方便喺唔同場合着，又話件長衫係用絲做，既舒服又暖身，即使每件要過千蚊都物有所值喎。
戴英倫Punk味骷髏錶
阿Paul穿上一身長衫後仲意猶未盡，一於潮到底，配上一隻骷髏頭鑽石錶，英倫Punk味十足，絕對係「Mix & Match」嘅典範。阿Paul話呢個「長衫Look」只會趁新春期間着多幾日，唔知今日會唔會着唔同嘅顏色呢？