九命毀於豬流感 防疫莫再發雞瘟

弊弊弊!慘慘慘!雖然新年流流理論上唔應該講衰嘢,不過茲事體大兼夾性命攸關,功夫茶不得不引述衞生防護中心總監曾浩輝公布嘅消息:今年H1N1人類豬流感引發嚴重併發症嘅個案較往年增加,幾十人需要深切治療,由上月二十四日至今已有九人死亡!

嗱,真係茲事體大,確實性命攸關,豬流感奪命個案愈來愈多,睇到人心都寒埋,直頭係毛管戙嗰隻。過去幾日之嘛,已經有四個豬流感患者死亡,包括兩名年僅四歲以及七歲兒童。唉,過年過節痛失心肝寶貝,為人父母肯定以淚洗臉。

講到呢度,功夫茶有一件事非常、極之、十分唔明解。大家記唔記得第一位豬流感疑似患者殺到香港嘅時候,食衞局局長周一嶽係幾咁緊張?當日係五月一日勞動節,周局長理得你係咪假期黃金周,一聲令下馬上封鎖病人入住嘅灣仔維景酒店,裏面住客一律不准外出,無辜辜坐咗幾日「瘟疫監」。不過搞笑嘅係,其實虛驚一場,跟住乜事都冇。好嘞,家陣豬流感實牙實齒攞你命,周一嶽之流嘅醫療大官點解反而好似若無其事?喂,死咗九個喇,又唔見你封鎖呢度、隔離嗰度?

所以話啫,港產官僚其中一個通病係該做唔做,唔該做就做到加零一。疫情平平無奇嘅時候就緊張到青筋暴現,病毒殺到埋身嘅時候就鬆懈到軟手軟腳。莫講話冇封鎖呢度、隔離嗰度吖,連呼籲市民盡快睇醫生或者打針預防豬流感都唔覺有囉。

港大內科學系臨床助理教授孔繁毅指出,大部分流感患者都係發病後五日以上先至入院接受治療,錯過採用特敏福治療嘅黃金時間。換言之,求診太遲,延誤抗疫,終於搞到大大鑊。既然係咁,食衞局一眾官僚係唔係應該扯盡喉嚨大聲疾呼,強烈要求市民及早診治呀?唔好意思,真係唔見。

曾浩輝預料,農曆新年假期結束之後學校復課,將會出現小型流感爆發,每次涉及數人至十餘人不等。呢位老哥又話,如果學校出現一宗流感死亡個案就需要停課一周。唔知大家有冇同感,曾浩輝呢一句說話非常之咁大吉利是,乜嘢叫做「如果學校出現一宗流感死亡個案」?莫非香港嘅醫療系統已經向豬流感扯白旗投降,認定學校必然會有死亡個案?喂,只要防疫工作做得好,有乜可能會死人o架!

有一件事算得上係半個好消息,港大曾經利用豬流感康復者嘅血漿提煉丙種球蛋白為病人治療,發現死亡率減少超過一半,不過治療費用高昂。計功夫茶話齋,費用高昂完全唔係問題,事關特區政府冇嘢叻,叻在錢多,庫房水浸,只要戒一戒孤寒財主陋習,絕對有能力撥款救人。

豬流感即係發豬瘟,可怕無疑係可怕,不過只要對症下藥理論上係可以控制嘅。問題係,萬一肩負醫療重責嘅周局長自己發雞瘟,咁點算呢?麻煩局長大人打醒十二分精神啦,九條命仔已經毀於豬流感嘞,防疫千祈唔好再發雞瘟!