政情：陳茂波兔年股票繼續揸
會計界立法會議員陳茂波（Paul）做會計師，出晒名係穩陣派，投資港股及外幣經常大有斬獲。面對兔年首日港股紅盤高開低收，尋日再跌多幾十點，佢估計可能係投資者擔心內地調控措施。不過，阿Paul對後市依然樂觀，佢話隨着歐美經濟環境逐步改善，失業率降低，種種利好因素加埋，佢估計兔年經濟環境唔會太差，暫時唔會減持手上股票。
有人話做議員好困身，但對於阿Paul可能係好事，點解？佢未做議員之前，做過香港會計師公會主席，加上本身嘅會計師行生意，經常要離港公幹，幾乎一年內有四分之一時間身處外地，飛行里數逾十萬公里，成為航空公司嘅白金卡會員。不過，自從阿Paul當選為議員後，公幹機會大幅減少，亦降級為金卡會員，佢嘅老婆仔女最開心，因為多啲時間喺香港陪吓家人嘛！