政情：陳碧鏵過檔無綫做推銷
喺八達通「賣料」事件孭鑊落台嘅前行政總裁陳碧鏵，雖然最後黯然離開，但塞翁失馬，轉個頭已經畀ＴＶＢ「六嬸」方逸華睇中，力邀佢過檔無綫。尋日電視廣播有限公司正式宣布，委任陳碧鏵為國際業務總經理，主力將電視節目推銷到海外。
無綫尋日發嘅新聞稿話，陳碧鏵曾經喺好多間著名企業做過要職，仲以「成績突出」形容佢過去嘅表現。陳碧鏵過去嘅表現係咪咁突出，就見仁見智喇；但聽無綫中人講，陳碧鏵主管ＴＶＢＩ，要發揮佢度橋嘅強項，將電視劇、綜藝節目等包裝後賣到海外，務求為電視台不停吸金。至於六嬸有冇眼光，大家不妨拭目以待。