政情：高官卸膊金句「一宗都嫌多」

曾蔭權喺○六、○八同○九年，分別就教師自殺、生果金同埋工業意外講過嘢，每次都用上「一宗都嫌多」呢句口號。可惜佢講完之後，香港嘅教育、福利同勞工政策有冇改善，大家有眼睇，最弊係其他局長照辦煮碗，將句說話「發揚光大」，重複又重複。

張建宗堪稱代言人

芸芸高官之中，勞工及福利局局長張建宗講得最多。可能係佢嘅政策範疇牽涉到廣大工人，大吉利是每逢有工業意外，佢都身先士卒親自到場視察，好似○七年發生喺銅鑼灣興利中心、○九年發生喺環球貿易廣場發生嘅工業意外，張建宗喺現場都會拋句「工業意外一宗也嫌多」出嚟。除此之外，○八年佢多次出席職業安全活動時，又會趁致詞時講一次，堪稱呢句口號嘅代言人，但講得多又有冇減少意外發生呢？

張建宗講得多，仲傳染埋其他問責局長。好似運輸及房屋局局長鄭汝樺咁，一扯上交通安全問題，佢就會話意外一宗都嫌多，最令人失笑係莫過於○八年六月廿六日，當日佢同張建宗分別喺兩個唔同場合都用上呢句話，真係夾都冇咁啱。

唐唐亂用 涼薄不堪

不過將句說話講得出神入化嘅，怕且係保安局局長李少光喇！佢喺○八年論及兇殺案數字上升時話：「對香港來說，一宗案件都嫌多，但我們幾百萬人嘅社會有這些兇殺案也不出奇。」能夠用完同僚句口號後，再直截了當為自己開脫，都算坦白得可愛。而用得最離譜嘅，則非政務司司長唐英年莫屬。記得舊年佢回應塌樹死人事件時話：「（塌樹）令到人傷亡，一宗都是嫌多……但香港打風落雨都會冧吓樹」喎，難怪死者家屬大鬧佢涼薄。唔知係咪因為咁，唐唐之後冇再用呢句口號。

其實呢句說話本身無問題，問題只在於諸位高官講完又講，但不愉快事繼續發生，證明口講無用、行動最實際，希望佢哋兔年可以少講多做，否則只會再次應驗年初二車公籤文所講嘅「威人威威不是威」，令煲呔曾領導嘅呢個夕陽政府更冇政治威信。