中環出更：王英偉睇實新昌百億工程
港區全國人大代表王英偉公職多多，平時佢公開談論生意經嘅機會愈嚟愈少，卓妮差啲就忘記佢係新昌營造嘅常務副主席。尋日王英偉喺中國會現身，講起新年願望，佢話今年會擺多啲時間喺新昌，事關新昌未完成工程合約已有過百億元，佢希望重新部署未來發展，將公司做好啲。
部署發展策略
以發展觀瀾湖高爾夫球項目為主嘅駿豪集團，三年前收購新昌之後，新昌嘅發展不過不失。不過農曆新年前幾日，新昌突然發公告話接到幾單重大建築同土木工程，令公司未完成嘅合約多達一百億元，股價隨之被炒起。唔知係咪人脈廣泛嘅駿豪兼新昌主席朱樹豪喺背後發功呢？
王英偉身兼駿豪同新昌嘅常務副主席，梗要睇實呢盤生意。佢話自己喺公司負責核數同發展策略，即係當工程完成後，審核係咪符合原先預期，當中最重要梗係預算賺幾多、係咪如期賺咁多。佢盛讚同事們好本事，次次都達標。王英偉未下海從商前曾任工業署副署長，專業同人脈搭夠，大家千祈咪睇小佢嘅威力。