中環出更：胡文新一心二用睇波又睇股
合和實業董事總經理胡文新（Thomas）稱得上係冰球運動發燒友，尋日佢又以香港冰球訓練學校主席身份，出席九龍灣MegaBox MegaIce舉辦嘅亞洲青少年冰球聯賽首站賽事。卓妮見Thomas一心二用，一邊睇球賽，一邊利用iPhone上網睇股市行情，見佢手機網頁上寫上「Price Fluctuat..（價格波幅）」，運動與投資同樣兼顧得宜。
講到兔年經濟，Thomas話內地經濟增長仍然強勁，香港背靠內地一定受惠，加上香港金融體系健全，銀行有效控制借貸，相信可以承受一定風險。至於股市同樓市前景，Thomas就話唔識睇，但強調最重要係經濟穩健，公司有良好經營環境才能運作得好。
Thomas玩冰球逾十年，從冰球上啟發出做生意嘅道理。佢話冰球運動好講團隊合作，正如一間公司需要上下緊密合作一樣，才能創出佳績，所以佢希望將冰球運動發揚光大，加緊到學校推廣。Thomas唔止打冰球叻，旗下冰球學校訓練出來嘅香港隊一樣咁醒，尋日以九比零大勝哈爾濱隊，但佢言談間不滿本港冰球訓練場地不足，話初步研究緊自行興建場地。