中環出更：「公幹歷險記」蔡加讚當磨練

爸爸「玩具大王」蔡志明去年尾斥資二億五千萬元購入鐘錶集團「喜運佳」，Karson隨即出擊，與家姐蔡加怡（Crystal）飛往鐘錶王國瑞士日內瓦參加錶展，順便搜羅精品。

但出發往瑞士前，Karson要出席一月十五日嘅深圳市政協開幕禮，當晚再飛廣西南寧，參加翌日舉行嘅廣西省政協會議。會後，Karson跳上往北京嘅飛機，想話再轉機往瑞士，但人算不如天算，當日南寧風雪太大，無法啟航。

蔡加讚鍾情尊貴嘅江詩丹頓腕錶，手上呢隻係佢個人珍藏之一。

蔡志明（右二）同喜運佳錶行淵源深，○九年九月錶行新店開幕，拖埋蔡加讚（左一）及蔡加怡（左二）齊到賀，去年尾索性買埋喜運佳。 （資料圖片）

航空公司安排旅客入住當地賓館，但指定要二人同房。Karson唔慣與陌生人同房，點算好？幾經爭取，原來多補一百元就可以自住一間房，Karson諗都唔諗，攞出一張紅底解決。

飛機延誤 拎行李摸門釘

當晚喺賓館小睡幾粒鐘，翌日清晨上機，終於順利飛抵北京，點知考驗又來了。北京飛瑞士蘇黎世嘅航程有延誤，Karson望望手錶，本嚟就要喺四十五分鐘內由蘇黎世嘅機場飛奔往轉機處，否則難以趕上往日內瓦嘅航機，依家連四十五分鐘都冇，相當黑仔。

佢記得當時蘇黎世下着大風雪，Karson極速跑到轉機處，登機閘門臨關上一刻，他啱啱趕及，成為最後一位乘客上機，大汗疊細汗之餘，認真捏一把汗！

可惜，行李未趕及上機，抵達日內瓦後，航空公司叫佢先返酒店休息，晚上十時再前往航空公司寫字樓取回行李。點知當佢冒住風雪抵達辦公室，裏面竟然烏燈黑火。原來佢遲咗幾分鐘，職員已下班了，惟有翌日再登門。呢次旅程，可謂一波三折，難怪Karson自嘆黑仔。

好彩，瑞士之旅不枉此行，拜會咗唔少國際知名鐘錶品牌供應商，包括卡地亞等，務求打響招牌。

Karson睇好鐘錶業增長潛力無限，現時「喜運佳」喺香港有八間分行，內地則有兩間。內地豪客消費力驚人，名錶不愁無出路。Karson緊記父親營商格言，堅守錶行嘅信譽同質素，父子同心，打造鐘錶王國！