街市烏煙瘴氣領匯卸責
沙田愉翠苑街市不但有食肆阻街，防煙門更長期「大開中門」，領匯被指撒手不管！不時途經愉翠苑街市的陳先生直指街市管理不善令購買意欲大減，「啲食肆擺晒枱櫈出行人通道，搞到行都冇路行，防煙門又話壞咗待修，但就整咗半年都未整好，真係離晒譜！」
領匯發言人表示，上址街市已由承辦商「歡卓投資有限公司」（下稱「歡卓」）承租，街市內之管理事宜亦由該公司直接處理，至於防煙門被指長開一事，發言人則指防煙門未有損壞，已提醒檔戶須經常關閉。
沙田區區議員姚嘉俊狠批領匯推搪塞責，未有盡力做好監察角色。「就算係外判咗畀人，領匯嘅管理角色都係責無旁貸，外判公司都要受監督㗎！」姚指領匯「寬待」外判公司，一旦發生意外將無從補救，促加強對監管外判公司運作。