政情：鐵頭仁恨抱孫恨出面

愛女話要先有普選才生仔

鐵頭仁去年嫁女做外父，當時大家問佢想有普選先定抱孫先，佢就口快快話想要普選。點知事隔唔夠一年，當鐵頭仁開始恨有個孫仔玩吓嘅時候，囡囡竟然用番同一句說話嚟答佢，話希望先普選後生仔，即係暫時唔想生BB，搞到鐵頭仁唔知好嬲定好笑。

鐵頭仁恨抱孫恨到出面，尋日招呼傳媒到佢屋企拜年，見到記者帶去嘅BB不知幾興奮，又攬又抱。不過大家咪以為鐵頭仁有三個仔女，湊BB就一定好熟手，佢自爆當年湊仔只懂得紙上談兵，一見BB喊就只會叫老婆換片或餵奶。睇嚟無論在公在私，鐵頭仁都要加倍努力爭取真普選，否則佢想抱孫都幾難。