政情：橄欖臨時竇口 得享天倫樂
民建聯立法會議員陳鑑林（橄欖）每年新正頭，都會邀請傳媒去佢沙田十二笏村間村屋大宅拜年，但今年就移師到佢大仔嘅牛池灣屋企。橄欖話，佢幢村屋要大裝修幾個月，加上大仔去年聖誕節一索得男，所以暫時搬到大仔附近住，方便佢去湊孫。
陳家長子嫡孫名叫陳源東，意指源自香港東方之珠，但大家就笑指橄欖嘅立法會票源自九龍東至啱。
鴻運當頭 四喜臨門
橄欖近排鴻運當頭，除咗榮升爺爺抱孫外，佢愛女同廿四歲嘅細仔亦分別鐵定於五月及十月結婚，一年內辦齊兩件喜事，佢愛女仲話結婚後會搬返屋企同佢一齊住添，唔怪得橄欖笑到見牙唔見眼啦！
橄欖太太曾衛明同外父曾生，早前分別自動當選成為十二笏村原居民及居民代表，現時村選戰況激烈，竟然無人出來爭櫈仔，真係唔講得笑。咁多件喜事加埋，確係四喜臨門。
橄欖向來投資有道，問佢點睇兔年樓市，佢話復建居屋無期，所以樓市會喺高位平穩徘徊，相信唔會有太大升跌，市民依然置業困難。至於股市方面，橄欖就預期繼續上落不定，但佢睇好內銀股，預料內地經濟好，會帶動股市及樓市上升。