政情：鄧鉅明億元進軍內地
一年之計在於春，相信大家兔年滿腹大計，太子珠寶鐘錶主席鄧鉅明（Jimmy）都唔例外，計劃全力進軍內地市場分杯羹。尋日初三沙田馬場跑賀歲馬，Jimmy夫婦都入場湊熱鬧，講起新年大計，Jimmy透露旗下公司手頭資金充裕，係適當時候開發內地市場，打算耗資過億港元喺內地開設三至五間鐘錶店，分店將遍及廣州、上海及北京。
代理手機值250萬
近年已有不少企業到內地發展，依家先起步會否太遲呢？Jimmy坦言，有充裕資金才能承擔風險，加上內地發展潛力巨大，有心唔怕遲。Jimmy仲透露，旗下公司將代理一部瑞士製造嘅LeDIX名貴摺疊式手提電話，內設陀飛輪裝置，並使用透明機殼，可看到內部機械操作，最大特色係毋須電池，只要每打開一次電話就可自動儲存三小時電量，最多儲存一百二十小時電量。
不過，咁先進嘅手機自然價值連城，每部售價高達二百五十萬港元，呢個價錢可以買到一個普通住宅單位，而全港只得二十部，簡直係尊貴象徵。Jimmy夫婦入場主要係食餐飯輕鬆吓，順道為老友林建康嘅愛駒「勇敢小子」打氣，雖然最終三甲不入，但難得新正頭同好友聚首一堂，喜氣洋洋，人生一樂也。