政情：EQ遇超級風暴滯澳洲
澳洲昆士蘭早前被百年難得一遇嘅超強颱風「亞西」吹襲，唔少港人都滯留當地，原來民建聯常委葛珮帆（EQ）都親歷其境。「劫後餘生」嘅EQ尋日同我哋大爆佢嘅澳洲驚險之行，唔單止行程被擱置，颱風吹襲當日，佢仲要執包袱，同逾四百個旅客一齊到酒店宴會廳避難，初嘗「走難」滋味。
原來EQ早前同老公一齊到澳洲自駕遊，由西到北再玩到落中部，足足玩咗十日。點知佢哋去到度假熱點開恩茲（Cairns）時，就遇着颱風來襲。佢直言，初時以為所謂嘅超級颱風，只係同本港嘅八號風球差唔多，一度繼續行程，仲喺暴風雨前夕坐直升機，認真唔知驚。
宴會廳集體打地鋪
翌日個風終於嚟料，面對外面嘅狂風暴雨，身處落地玻璃窗酒店房嘅EQ驚到腳軟。佢最後同老公就應酒店呼籲，每人手執枕頭同被鋪落樓下嘅宴會廳同其他旅客一齊「大覺瞓」，而食物仲要有限度地配給添。EQ心有餘悸話，今次係一個好難忘嘅經歷，好彩仲趕得及返港過年。
