政情：林鄭春節親民博乜？
要數新年期間最忙碌嘅政府高官，發展局局長林鄭月娥肯定係其中一個。佢前日同尋日一連兩日落區，前日去咗探訪長者，尋日就到西貢三條村探訪，了解村民生活。或者大家會問，林鄭係發展局局長，無端端落區探訪，同佢嘅工作有咩關係呀？哈，唔講唔知，林鄭選擇呢兩個項目其實別有深意，原來「老人」同「西貢」與林鄭都好有淵源。
先講前日，林鄭喺社會福利署副署長林嘉泰陪同下，去咗黃大仙慈正邨探訪獨居長者，其中一位長者福伯，更加係林鄭喺十幾年前擔任社會福利署署長期間已經認識嘅老朋友。探完老朋友後，局長又去咗東華三院屬下嘅復康中心，即場向在場嘅院友大派利是，過咗一個開心又忙碌嘅年初二。
返西貢晒舊政績遇投訴
到尋日年初三赤口，大家都唔去拜年，但林鄭就落咗西貢探望舊街坊。原來局長喺八三至八五年間做過西貢民政事務助理專員，今次係應識咗廿幾年嘅老友西貢區議會主席吳仕福邀請，落區視察，順道敍舊。福哥話，今次請林鄭去西貢，係想佢關注吓新界舊區重建問題，希望政府唔好只係集中市區嘅重建項目。
林鄭尋日走訪咗官門漁村、靈恩台同伯多祿村三個點，街坊見到高官大駕光臨，大部分表現得好興奮，仲有小朋友即場舞獅歡迎，搞到林鄭眉開眼笑，即時向在場小朋友大派利是。
難得有高官到訪，居民當然把握機會要求政府改善民生。有一位婆婆向局長大吐苦水，話老人家有病唔知點求助，又話即使政府有福利，佢哋都唔知去邊度拎。雖然居民有投訴，但林鄭都冇黑面。陪同林鄭落區嘅吳仕福亦即時幫林鄭解圍，答應幫手跟進同反映，婆婆都滿意收貨。
尋日係大年初三，仲係公眾假期，不過林鄭有假唔放，反而落區探望舊街坊，據聞佢老公飛咗過去英國探望兩個仔，林鄭都冇一齊去。好多街坊尋日都有同局長講恭賀說話，最多嗰句就係祝佢「步步高陞」。一直盛傳林鄭係下任政務司司長熱門之一，尋日佢聽到呢句話時總面露尷尬神色，仲好謙讓咁話：「唔好喇啩？不過都多謝晒！」林鄭有假唔放，連續兩日落區，唔通真係希望「步步高陞」？
