中環出更：田少愛駒W咗好風騷 名人馬場行大運
尋日係年初三赤口，不宜拜年，唔少名人選擇入馬場行大運。旅遊發展局主席田北俊喺賀歲馬先拔頭籌，贏得逾三十六萬頭馬獎金。廣東社團總會主席王國強（KK）都中二獎，佢匹團體馬跑第二，袋逾十八萬元。數全場大贏家，非鋼鐵大王龐鼎元太太龐熊少珠莫屬，佢家族旗下愛駒「點心」揚威「主席短途獎」，袋二百五十多萬元巨獎，大發新年財！
名人招財衣着催運
樓股齊升，馬迷心情靚，沙田馬場尋日旺丁又旺財，會員席熱鬧過行花市，名人各出奇謀招財，滙豐中國董事長鄭海泉打紫色呔，春風滿面；恒隆董事總經理陳南祿同「造紙大王」理文造紙主席李運強亦分別打番條紅色呔增強運勢。
女士都唔弱，李運強太太與仁濟醫院董事局主席董吳玲玲一身紅噹噹，唔到你唔信，果然財星高照，喺馬場發咗少許新年財。KK喺衫袋暗藏一條中國式絲質頸巾招財，佢隻「龍城動力」喺第四場跑第二，總算有交代。
在此之前，KK貼中第三場出賽嘅田少匹「風雲武士」，投注一千元獨贏及一千元位置，結果隻馬跑第一，帶挈佢袋九千幾蚊，但新年支出多，KK笑言獎金唔夠派利是，旨在攞個好意頭。
龐老太利是四圍派
贏頭馬嘅田少風騷到極，佢本來有叫埋太太一齊入場打氣，但田太早早打定輸數，唔肯入場，由田少獨力做啦啦隊，結果愛駒好爭氣，旗開得勝贏頭馬。
田少係穩陣派，本來只買位置撐愛駒，黨友張宇人話要贏就贏到底，最後田少買埋獨贏，得獎後搵埋KK拉頭馬。
論全場焦點，實屬香港福布斯富豪龐熊少珠。一身紫紅唐裝嘅龐老太，一入場就做財神，攞住大疊利是四圍派。
果然龐老太大發新年財，由孫兒龐俊怡做馬主嘅「點心」，喺第八場以凌厲姿態衝線，勇奪「主席短途獎」，捧走二百多萬獎金，開心過新年！
卓妮