政情：毓民落區開檔狙擊KK

今年區議會選舉七國咁亂，泛民除咗要同建制派角力外，自己亦互相殘殺。誓言要喺選舉狙擊白鴿黨同民協而成立嘅「人民力量」，初步戰略圖已定，其中組織首腦、早前退出社民連嘅黃毓民同陳偉業（大舊），更會分別狙擊民協馮檢基（ＫＫ）同白鴿黨主席何俊仁，大戰未開始已聞到一陣火藥味！

因堅持狙擊白鴿黨同民協而毅然退黨嘅毓民，尋日透露自己會喺深水埗元州邨同李鄭屋邨開設議員辦事處，過年後就會開幕。早前已傳出ＫＫ會棄守麗閣，轉戰李鄭屋，毓民今勻擺明係衝住ＫＫ而來。

佢仲話喺「公投」即係去年嘅立法會補選，佢喺ＫＫ兩個票倉取下逾四千票，直言自己好有信心，「我計過度過先狙擊嘅，你去搞人，最後搞唔到好樣衰o架嘛！」

據悉，人民力量暫時已招攬到五、六十位死士出選，喺元朗有一定勢力嘅神州青年服務社，將會夥拍大舊出戰新西，而大舊更有機會負責狙擊鐵頭仁，令鐵頭仁攞唔到超級區會議席嘅入場券。究竟佢能否挑戰票王鐵頭仁呢，大家就要拭目以待嘞。