政情：李家傑錫貧童顯父愛
恒基地產副主席李家傑一索得三男，捲入搵代母產子風波之後，已經鮮有公開露面，專心做千億湊仔公。李家傑無打算同人分享湊兒之樂，反而喺新一期「新家園」季刊，大談幫助內地貧童嘅感受，都係關於愛錫細路仔，同樣係父愛滿瀉。
籌一億組新家園助新移民
家傑半年前同世貿集團主席許榮茂牽頭，與一班內房股老闆，籌募一億組成新家園協會，專門協助香港新移民。喺佢哋新一期季刊中，家傑以監事會主席身份接受專訪。家傑鍾意細路仔係人都知，佢喺訪問中透露，佢嘅慈善工作有三個重點，其中一樣就係關注內地嘅貧病兒童。所以李家傑早前成立咗個「愛佑童心」專項基金，資助西北地區貧困家庭裏患有先天性心臟病嘅兒童所需手術費用。
今次訪問仲刊登咗一張家傑探訪受惠「愛佑童心」內地貧童嘅照片，家傑哄塊面畀BB仔錫「面珠墩」，一臉幸福滿足，好有慈父相。
嘩，如果李家傑同時畀三個金叵羅錫，肯定興奮到爆！