政情：建制派兔年無運行!?

克勤仔情海翻波

香港術數家協會術數師楊子東日前批算過一眾高官運程後，今日再批算立法會議員運程。建制派之中，民建聯陳鑑林（橄欖）、葉國謙、陳克勤、鄉事派張學明及自由黨主席劉健儀最運滯。橄欖喺兔年比劫爭財，處境不利，農曆九月運勢最惡劣。葉國謙命格就忌金水，七、八、十一及十二月運勢最差，但九月人衰佢旺。至於克勤仔嘅命格就旺桃花，有情感波折及負面新聞。

至於鄉事派張學明，兔年運勢好壞參半，將面對人事鬥爭局面，如果套入上半年鄉事委員會及鄉議局換屆改選嘅亂局，確係不謀而合。泛民主派方面，早前被指無理解僱女助理嘅民主黨甘乃威，兔年運勢未許樂觀，心情固然忐忑，未能衝破事件陰霾，加上立法會就事件展開調查嘅報告極有可能喺今年公布，佢喺年底舉行嘅區議會選舉，預料困難重重。

任亮憲是非不絕

近期搞到廉政公署漏夜上門調查嘅社民連，繼黃毓民及陳偉業退黨後，剩下主席陶君行苟延殘喘，佢嚟緊兔年行「忌神運」及沖「夫妻宮」，農曆四月運勢最差，九月好轉，但十一及十二月再遭對手圍攻，而諗緊退黨嘅長毛梁國雄則可能因財招惹是非。不過，運勢再差都唔及任亮憲，楊師傅話佢命格忌火土，傷官見官，小人是非不絕，官非未能解決，要捱過農曆五月及九月兩個難關並不容易。

雖然黃毓民及陳偉業已退出社民連，但運勢亦唔見得好。毓民退黨後依然保持強霸本色，但農曆甲午五月嘅小人是非最厲害，九月更可能有破財危機。陳偉業命格則多勞少成，凡事多阻滯。至於立法會嘅好運一族，有旅遊界謝偉俊同公民黨陳淑莊，陳淑莊喺農曆九月最旺，遇強愈強打響名堂，必有作為，睇怕可以坐定粒六連任中西區山頂區議席。算得準唔準，大家就拭目以待喇。