中環出更：名人返家度歲 絡繹機場
農曆新年無嘢好得過一家人齊齊整整食餐團年飯，喜氣洋洋歡度新春佳節。卓妮發現呢幾日特別多名人出入機場，單係尋日機場VIP出入口已遇到可持續發展委員會主席陳智思（Bernard）、金融管理局總裁陳德霖同陳唐芷菁兩公婆及有「新金王」之稱嘅金至尊主席黃英豪夫婦，無論佢哋出境或入境，目的只有一個，就係趕住同家人一齊，歡度新歲。
Bernard父親陳有慶係泰國華僑，一家人每年例必返泰國過新年，今個農曆新年都唔例外，佢尋日中午啟程到泰國，直到年初四才返港。
Bernard離開無耐，卓妮又見到陳德霖夫婦喺閘口行出嚟，佢哋話剛剛公幹完回港，準備過農曆新年，又祝願港人新年快樂、身體健康。至於黃英豪夫婦亦啱啱返港，佢話之前去咗美國波士頓洽談鑽石生意，希望農曆新年期間可以唞番吓喎。
肥仔明留港過節
留守香港過節嘅一班立法會議員都各自精彩，卓妮尋日喺立法會遇到議員李華明，佢話每年都要團兩次年，包括同八十幾歲嘅媽媽出去酒樓食飯團年，又會邀請外母一家到自己屋企食飯過節，由太太親自發辦及下廚，佢就做跑腿去買齊啲材料返屋企。問肥仔明佢老婆有乜巧手菜式，佢斗膽「彈」老婆啲餸無乜特色，話最重要係一家人開開心心食餐飯。
不過，肥仔明大讚太太親手整嘅蘿蔔糕好味道，據講佢太太跟師傅學過，用料十足，最大特色係無添加味精及雞粉，所以相當受歡迎，每年都要整七至八底送畀親戚品嘗。肥仔明太太一向注重老公嘅健康，整蘿蔔糕都以此做出發點。