守財奴鬍鬚曾在其網誌狂扯「改變，由你開始」，上帝就笑了！任何人都可以講，就係鬍鬚曾唔得，觀其財政預算案，年年歲歲都相似，變不出甚麼令人眼前一亮的長遠扶貧政策、刺激經濟之道；最不知所謂就係問人有乜好嘅提議，遇示威人士遞苦瓜，唔肯接都算喇，又叫人拎返屋企煮來自己食，如此胸襟，你話有乜資格做青年導師。
鬍鬚曾除了胸襟淺窄，更剛愎自用，一句「派糖」彷彿攞佢首級嘅血滴子，話唔鍾意「派糖」呢個講法，又話「應使則使」，自己石頭腦加上守財奴心態，一話「派糖」就如萬箭穿心！眼前低下層在通脹的水深火熱下掙扎，「派糖」以濟市民燃眉之急，有何問題？「改變，由你開始」，係大眾市民向你怒吼才真！
鬍鬚曾自己死牛一邊頸，卻叫青年人「改變」，不以身作則，其言又怎會可靠？我們對聖人也不必迷信，因為道德那東西並不可靠。張建偉於《溫故戊戌年》有個資料，話說康有為曾經落魄上海，天天去狎妓，卻沒錢給。久而久之，讓妓家知道了，群到康有為所住客棧索取，康有為覺得不好意思，就往廣東逃。上船之日，各妓家都到船上找他，搜了半天找不到。船開後，有水手見船板內有人，大驚，呼眾人來看，正是康有為先生。看來，他必尷尬萬分，恨不得跳進大海。後來，有人寫詩諷之：「避債無台卻有舟，一錢不值莫風流。」
聖人如此，對守財奴鬍鬚曾講「改變」，自然也不必迷信，因為「應使則使」那東西並不可靠。一個人奴性太重，往往跳不出框框，不派糖難道真的派間廠？