政情：沈祖堯暗寸唐唐失言
上月中喺一個青年學術會議上警告八十後因住「車毀人亡」嘅政務司司長唐英年，今次真係一語成讖！尋日中大亞太研究所公布嘅民調顯示，市民對唐唐嘅評分跌破合格水平，唔知係咪畀佢連累，連帶兩位司長以至成個特區政府，得分全線下跌。中大校長沈祖堯接受訪問時，亦話大部分年輕人不太關注社會問題，用激進手法抗爭嘅只係少數。
唐唐早排叫年輕人唔好「剛愎自用」，否則好易「車毀人亡」，引來各界炮轟，有人仲激到送架紙紮車畀唐唐，點知佢不但無顯示司長嘅應有風度，反而同示威者講：「留番你第日自己用」，認真不應該，難怪佢喺中大民調嘅評分跌咗二點七分，得番四十九點四分啦，唔合格！
沈校長接受訪問時，雖然無正面回應唐唐嘅說法，不過佢話其實大部分學生只係關心成績同將來嘅工作，用上激烈手法抗議嘅只係少數。言下之意，唔知係咪想話畀唐唐聽，犯不着用咁激嘅言辭嚟詛咒年輕人？