政情：特首辦「面書」歪曲民意
通脹加劇、百物騰貴，隨街訪問幾個市民都知佢哋滿肚牢騷，可見年關有幾咁難過。特首辦facebook（面書）「上亞厘畢道」尋日就上載咗政府新聞網嘅訪問片段同內容，當中訪問咗唔少市民過年嘅心情，不過千祈唔好對條片有咩期望，皆因佢哋嘅「傑作」相當「河蟹」，受訪者個個對通脹或本港嘅社會問題隻字不提，內容一片唱好，喜氣洋洋，講到香港歌舞昇平、人人有工開咁，擺到明要刻意營造和諧嘅社會氣氛。
特首辦推出嘅facebook專頁「上亞厘畢道」一直未獲好評，唔少市民都批評港府有正經事唔做，浪費納稅人嘅錢搞埋啲無謂嘢。政府新聞網今次咁做，簡直搶埋記者份工嚟做，喺街上同市民做街訪，話要了解市民新一年嘅願望喎，實際係搞平衡。不過特首辦嘅官員剪片時就唔知有心定無意，喺片中全部嘅受訪者都冇乜講負面嘢，對社會存在嘅貧富懸殊、樓價高企及通脹等問題，隻字不提，一味講香港有幾好，大家心情有幾靚。總之就你有你怨，我有我講，又係港府漠視民意又一力證！