政情：棠哥頸椎開刀 不宣再拖
我哋早前爆料，話身兼行政會議成員嘅工聯會會長鄭耀棠，已經連續缺席三個星期行會會議，原來事件背後另有內情，並非事務纏身告假咁簡單。棠哥「潛水」避曝光，實情同佢頸椎移位病情有關，事關佢嘅病情非輕，已經惡化到引致右手同右腳麻痹、影響正常行動嘅地步，醫生建議需要進行外科手術治療。照咁睇，棠哥唔好話開唔到行會，連每年一度嘅三月北京人大、政協「兩會」，今年都隨時要請病假。
棠哥連續三次缺席行會，上星期工聯會出新書《勞苦工高》，鄭重其事搵中聯辦主任彭清華同煲呔曾寫序，但貴為工聯會總舵主嘅棠哥，卻繼續潛水無現身，事態反常，心水清者知事有蹊蹺，一經打聽，原本棠哥真係有不為外人道嘅隱衷。
返工聯開會 行動見不便
棠哥多年戰友、工聯會黨團召集人黃國健（KK）同我哋證實，棠哥因頸椎移位，已經影響到右手同右腳嘅活動，雖然棠哥仍然有返工聯會開會，但行動已見不便，醫生建議長痛不如短痛，開刀以根除後患。KK話，現時內地做頸椎移位手術，已有豐富經驗，不過，做手術始終存在風險，棠哥最終會唔會決定開刀，又或者喺香港定喺內地進行，各位工聯嘅戰友都唔敢置喙畀意見，都係等棠哥同佢嘅家人好好商議，相信農曆新年後會有決定咁話。
其實，棠哥上年底已經主動向傳媒自我引爆病情，自爆患上頸椎移位三個月，記者當時見棠哥身形激瘦逾十磅以上，臉、頸同膊頭都縮咗一個碼，見者猶憐，雖則話時下流行瘦身，但始終健康最緊要，尤其依家陳婉嫻至今堅拒代表工聯會出征「超級區議會」，棠哥成為最有實力嘅後備人選，睇嚟棠哥對自己個病不宜再拖，真係要認真考慮吓接受手術至得嘞。
棠哥至今未扑錘接受開刀，心情十五十六，我哋絕對可以理解。據骨科醫生所講，頸椎開刀並非小手術，有一定風險，一旦手術失敗，可能導致下身癱瘓。棠哥要對咁大嘅賭博下注，心情可能仲忐忑過係咪參選「超級區議會」。