中環耳目：鄭錦鐘蔡加讚 「潮」化九龍西
潮州富商叱咤香港，影響力唔嘢小，但「家己冷」相當熱情，時刻想同港人分享潮州鄉情。由保良局副主席鄭錦鐘（Eric）發起嘅九龍西潮人聯會，嚟緊三月將首次舉辦「九龍西潮州節」，搵埋玩具大王蔡志明囝囝蔡加讚做籌委會主席。Eric同加讚年齡差一截，但同屬「潮人」，合作無難度。
頭炮千人大巡遊
Eric上周三晚上相約加讚喺九龍城廣場「佳寧娜」食潮州菜，順便傾吓仲有咩要做得完善啲。話晒首次做大騷，加上節期臨近，三月二十日就開鑼，身為搞手嘅加讚唔敢鬆懈。
潮州節為期一周，Eric同加讚已度好節目，頭炮係千人大巡遊，開鑼日上午由深水埗楓樹街球場出發，途經彌敦道及油麻地。巡遊隊伍邊行邊上演潮州大鑼鼓，仲有表現梁山好漢精神嘅「英歌舞」等，盡顯潮州特色。
上午巡遊，下午三時就喺加讚地頭九龍城廣場搞啟動禮。喺潮州節期間，加讚仲喺商場大搞潮州美食、潮州工藝品及潮州四市等展覽，方便市民邊食邊欣賞，聯會逾萬名會員仲有機會享有折扣，但市民可即時入會，費用全免。廿六日閉幕禮上，聯會將頒發獎學金，得獎學生來自九龍西六十九間學校。整個潮州節預計花費一百五十萬元，加讚及Eric出錢出力支持，捐幾多就話唔講喇，認真唔話得。
加讚心繫潮州有原因，事關嫲嫲自細同佢講潮州話，耳濡目染下，聽潮語絕無問題，卓妮見佢講得好流利添。加讚嘅飲食口味亦好「潮化」，家庭聚餐例必揀姐夫馬鴻銘喺九龍城廣場開設嘅佳寧娜潮州菜，佢哋出品嘅胡椒鹹菜豬肚湯，驅寒又醒胃，啱晒體質較寒嘅加讚。另一味家鄉煎蠔烙，都係佢「飛佛」。
蔡家遊澳洲度歲
嚟緊新年，鄭錦鐘會例牌同班老友出外度歲，今次揀咗去泰國曼谷避寒。加讚就同家人遊澳洲，先去珀斯，再去墨爾本。澳洲早前遭遇世紀大水災，呢兩處地方暫時未受影響。墨爾本以賭場出名，唔知運氣極佳嘅蔡志明，會否趁機發吓新年財？