中環出更：許安璞煮有機菜賀愛犬牛一
眾生平等，人生日要快樂，狗狗一樣要慶祝。公開大學校長梁智仁同太太許安璞上星期六就同「寶貝女」Maffin以及另外兩隻一月之星狗狗一齊開生日會，梁太特別早一日預備美食，燒定羊髀、整定蛋糕畀「囡囡」過生日，有啲仲要係有機食品，夠晒矜貴，認真「慈母心」。
梁太廚藝出眾，「寶貝女」兩歲生日，梁太當然要煮餐勁嘅畀狗囡囡同班狗友開心吓。除咗自製三款不同味道嘅無糖生日蛋糕之外，仲有四十個小蛋糕仔，梁太仲細心用紅蘿蔔做蠟燭，好有心思，不過最快畀班狗友「清盤」嘅，要數雞飯同羊髀沙律。
人狗共食 分甘同味
狗仔唔食得油又唔食得鹽，梁太特登買咗隻有機雞嚟煲湯煮飯，再將雞肉切粒，加埋紅蘿蔔、西蘭花等新鮮蔬菜，好味又有益。至於羊髀就要早一日烤咗先，翌日再伴以西蘭花、蘋果等材料。不過話就話係畀狗食，梁太自己都唔客氣，食咗少少，一於分甘同味。
咪以為對愛犬寵愛有加，梁太就實係狗癡，其實Maffin係梁太第一隻養嘅狗。梁太四十二年嚟都係做好稱職主婦呢份工，結婚以來事事以丈夫同兩個仔為先，為佢哋提供一個五星級的家。依家兩個仔都大晒，各有事業，不時英國、美國周圍飛，梁太先至有時間分畀Maffin。
其實真正鍾意狗嘅係梁校長，見佢成個生日會同近十隻狗玩唔停，隻隻都同佢老友狗狗，對住佢又擺尾又伸手。梁太話，兩年前佢哋去英國，得閒陪梁生去睇狗，喺一間狗店邂逅狗B女Maffin，點知呢個醒目女一見到女主人，即時撲埋嚟，氹到梁太好開心，二話不說就將佢抱返香港。
依家兩個仔仔都長大，不時英國、美國周圍飛，不過生日會都有幾個小朋友嚟參加，望住可愛嘅小朋友，梁太都不期然流露出慈祥嫲嫲嘅眼神，唔知佢兩位公子幾時幫佢實現夢想呢？
卓妮