政情：肥根續被政府當波踢
官場推莊卸責歪風盛行，漁農界黃容根今月中喺立法會答問大會爆大鑊，向煲呔曾投訴，新界西近年大興土木導致漁民損失慘重，佢為漁民出頭追討賠償，竟然被四個政府部門當波咁踢嚟踢去。肥根突然發炮，大家以為相關官員知驚，點知半個月過去，至今無人主動聯絡肥根跟進事件。
漁民版「秋菊打官司」
政府部門投訴接受，態度照舊，究竟係當肥根透明，定係當煲呔曾無到？肥根話，佢都搞唔清楚，但已經再度約見有份將佢當波踢嘅食物及衞生局官員，但副局長梁卓偉繼續推波，話工程賠償問題由鄭汝樺揸弗嘅運輸及房屋局主理喎，點知去到運房局副局邱誠武，得到嘅答案只係：「睇吓點先。」
肥根話，佢身形圓渾，但唔會容忍畀人當波踢，遲啲會搵埋其餘嘅環境局同發展局算帳，甚至踩到「唐唐」唐英年頭上，總之要為漁民討回公道。肥根呢次上演似漁民版「秋菊打官司」，唔知最終能唔能夠取回公道呢？