政情：黃華麒塞晒三條血管
廣播處處長黃華麒因健康理由不續約，下月約滿退休，佢尋日出席任內最後一個公開活動時就憶述番當初發現心臟病的經過，講起都話當時心驚驚，突如其來嘅病症嚇親屋企人，好彩醫生畀足信心，「通波仔」手術成功，仲話期間「未驚未痛過」添！
起身心臟亂咁跳
黃華麒尋日出席香港電台一個宣傳活動，以自身突然發現心臟病嘅故事，勉勵殘疾人士同樣要勇敢面對。佢話有一日起身突然頭痛、心臟亂跳十秒，佢膽戰心驚，似係心臟病嘅先兆，於是求醫檢查，果然發現心血管阻塞。
麒伯形容當時嘅心情好混亂，太太同仔女知道消息後都大吃一驚，好彩資訊發達，翻查資料後發現手術成功率高、復發率低，「安心好多，手術前知道三條血管塞晒，醫生都同我講話係濕濕碎！」
結果手術成功，差不多五分鐘就通完一條血管，佢手術期間意識清醒，全程都未驚未痛過，依家生活仲回復正常添。
佢話退休後要周圍旅遊、「見多啲美好事物」，不過最遺憾就係唔再續約，無得見證港台數碼化喎。