政情：葉劉唔使民記幫拖
政治向來冇免費午餐食，新民黨主席葉劉淑儀亦深明此道。於○七年立法會港島區補選曾靠民建聯過票嘅葉劉話，雖然民記喺過去選舉都有助自己及匯賢智庫一把，但明言自己依家已經組黨，故將來已冇資格、亦唔需要再搵民記幫拖喎。老實講，民記過去一年喺唔少議題上，立場都飄忽不定，時因護住特衰政府而得失民意，若葉劉黐埋去，隨時得不償失，所以與其話佢做人「均真」，不如話佢認清現實更貼切！
葉劉組黨後愈戰愈勇，尋日接受電台訪問時，更首度開腔話對參選特首「聽其自然」。問到佢怕唔怕做特首會好辛苦時，佢仲即時搶答話，自己係辛苦命，又冇家庭負擔，乜嘢崗位都鍾意做喎。呢個答案，絕對予人無限想像空間。
葉劉又揚言，喺今年年底嘅區議會選舉，新民黨至少會派出八至十名精兵，瞄準中產區全力出擊。佢直言，自己過去唔夠地區樁腳，故喺上年南區薄扶林選區補選，亦需靠民記幫手，但矢言自己經已組黨，唔可以再厚面皮要人幫，「政壇經已進入戰國時代啦，我唔相信仲會有政黨過票畀人囉。」
民記幫特衰政府 跟佢冇運行
佢仲刻意同民記劃清界線，聲言自己嘅基本盤同民記唔同喎，對方針對基層及公屋嘅票源，而自己只對中產議題有興趣，無意喺公屋區發展。言下之意，莫非佢同民記已經喺搶票方面取得默契，大家爭取唔同票源，自己雖然唔再受民記嘅恩惠，但亦唔會倒戈搶對方票？又唔攞基層同公屋票，又唔同民記搶票，葉劉認為自己喺七除八扣之後都夠贏，都幾老定喎。
不過話時話，民記嘅支持唔要都唔可惜喇，佢立場飄忽，一時一樣，又要幫特衰政府，又驚得失選民，跟佢都隨時冇運行喇。
新民黨今年首次喺年宵擺檔，葉劉尋日偕兩位副主席田北辰同史泰祖到場剪綵，仲為市民寫揮春，大打民意牌。佢仲笑言，自己同田二少都屬虎，而史醫生就屬龍，故可謂「龍虎會」喎。