中環出更：莫華倫開騷全家齊捧場
好耐無喺香港開個唱嘅男高音莫華倫，上星期五同港產指揮家葉詠詩喺大會堂一齊「為音樂高歌」，早一日先啱啱喺韓國返嚟嘅莫高音，一落機就綵排咗三個鐘，演出日又再練多三個鐘，時間非常緊密。所以佢個好老婆Winnie一早嚟幫手打點，仔仔禮剛亦爭取時間陪住嗲哋，一家人好溫馨。禮剛都係古典音樂迷，不過懂事嘅佢平時好少同爸爸一彈一唱，因為爸爸鍾意自彈自唱，加上佢怕阻住爸爸練習，所以唔敢喺爸爸練歌時去偷師。
莫爸爸係頭號粉絲
講番今次演出，見入場張海報貼咗滿座標貼，Winnie話好多朋友一早買咗飛，所以佢都好多謝大家咁支持。不過要數莫高音嘅頭號fans，應該非佢爸爸莫慶義醫生（圓圖）莫屬，逢親仔仔開騷，無論喺香港、澳門、廣州、上海定北京，佢都會飛過去睇。雖然好支持兒子事業，不過同太太都係大國手嘅莫醫生，始終無人承繼衣鉢，難怪佢有少少想禮剛可以從醫，不過佢當然都尊重乖孫決定啦。
除咗莫醫生同太太，身為哥哥嘅莫華彤亦一早嚟招呼朋友，李錦記主席李文達夫婦同公開大學校長梁智仁夫婦等都拍拖捧場。
卓妮
